Organisashon

Kuerpo Polisial di Kòrsou ta resortá direktamente bou di minister di Hustisia. E minister aki ta polítikamente responsabel pa tur loke e organisashon hasi, tin nesesidat di dje i eventualmente falta kuné. Na momentu ku Kuerpo Polisial ta aktua den kuadro di mantenshon di òrdu públiko e ta resortá bou di Minister di Hustisia i den kuadro di investigashon di kasonan penal, e ta kai bou di Prokuradó General.

Maneho diario di e kuerpo ta keda ehekutá pa un tim di maneho, ku ta konsistí di:

• Hefe di kuerpo;
• Hefe di Kuerpo suplente;
• Hefe di Servisio Polisial (servisionan uniformá);
• Hefe di Servisio di Reshèrshi i Informashon;
• Hefe di ‘Bedrijfsvoering’ enkargá ku maneho di e prosesonan di e organisashon.

E organisashon ta repartí den tres divishon, esta: Servisio Polisial, Servisio di Reshèrshi i Informashon i ‘Bedrijfsvoering’. Algun departamentu ta kai direktamente bou di Hefe di Kuerpo manera entre otro e Departamentu di Komunikashon & Prevenshon i Departamentu di Asuntunan Interno. Kada un di e divishonnan aki tin un kantidat di departamento bou di nan, ku huntu ta realisá trabounan, pa nos komunidat por haña e servisio ku e mester i garantisá òrdu i trankilidat pa tur siudadano i bishitantenan por biba i move trankil riba nos isla.

KPC ta stipulá su metanan na kuminsamentu di aña a base di un plan di aña, den kua ta tene kuenta ku tur e retonan, difikultatnan pero tambe faktornan di éksito di e aña(nan) anterior. Banda di esei ta duna atenshon tambe na nesesidatnan di komunidat i ta inkorporá den e plan, dokumentunan relevante manera programa di gobernashon, plan di aña di partnernan ku ta hopi importante pa kuerpo manera e.o. Ministerio Públiko i otro servisionan i/o ministerionan. E organisashon ta traha tambe un plan di maneho i for di esaki ta derivá e komunikashon stratégiko i plan di komunikashon, pa medio di kua polis ta responsabilisá su mes na komunidat.

Komunidat por drenta den kontakto ku polis na diferente manera:

1. Via di telefòn: sea por yama 911 pa un kaso di emergensia, 917 pa kasonan no urgente òf por yama tambe na un di e wardanan di polis;
2. Tambe por aserka polis via di un di e diferente ‘e-mail’nan òf por hasi denunsia via e wèpsait di polis polis.cw.
3. Por yega na un di e wardanan di polis pa un di e servisionan ku polis ta ofresé.

Kuerpo Polisial ta traha huntu ku diferente partner, tantu riba e tereno di inteligensia kaminda informashon ta keda interkambiá,  komo den e trabou real di kombatí krímen i mantené òrdu. Na nos fronteranan p.e., e personal di Imigrashon i polisnan stashoná na Hato, ta keda asesorá pa Mareshosé.

Kontinuamente tantu esnan enkargá ku guia komo e personal enkargá ku ehekushon di tareanan básiko di duna asistensia, mantenshon di òrdu i di investigashon, ta risibí formashon dor di asistí na diferente tayer, estudio i ‘training’ di kapasitashon. Di e forma aki nan por hasi nan trabou di un manera profeshonal i brinda un servisio optimal na komunidat.