Komportashon den tráfiko

Nos ta drentando 2017. Temporada ku tin mas trafikashon ku normal riba kamindanan públiko. Esaki ta trese kuné tambe ku hopi outomobilista ta falta ku reglanan di tráfiko, pa desviá filanan largu. Konsekuensia di esaki ta aksidentenan di tráfiko innesesario ku na nan turno ta sòru pa mas opstakulisashon riba nos kareteranan.

Un otro faktor ku tur fin di aña Kuerpo Polisial ta notando ku ta kontribuí na aksidentenan chikí, grave pero tambe fatal, ta korementu di vehíkulo bou di influensiá di alkohòl òf otro supstansia prohibí. Nos ke enfatisá tambe riba vehíkulonan den estado tékniko defisiente ku ta subi kaya òf di kua dokumentunan no ta na òrdu.

Kada individuo ku ta manehá un vehíkulo mester ta konsiente di e rísikonan ku e ta eksponé su mes i otronan na dje, na momentu ku e ta aktua kontra di leinan di tráfiko. E fin di aña aki polis lo ta estrikto ku kontròlnan di tráfiko i ta aktua di un forma severo kontra esnan ku ta faya ku regla.

Lo no permití ningun vehíkulo di kua dokumentunan no ta na òrdu òf téknikamente no ta den bon kondishon, sigui move riba vianan públiko. Tambe lo aktua determiná kontra ponementu di ‘fever’ i otro hazañanan ku ta hinka usuarionan di tráfiko den peliger òf ku di un òf otro forma ta forma molèster pa e bisindario.