Kiko pa hasi

Kiko pa hasi

Kiko pa hasi

Bo a yega di pèrdè bo pasport, sédula òf reibeweis? Òf bo tabata envolví den un aksidente di outo? Bo tabata sa kiko pa hasi e ora ei? Na kontinuashon ta duna splikashon kiko por hasi den e diferente kasonan aki.

Pèrdè pasport, sédula òf reibeweis

Mèldu e pèrdida di bo pasport òf sédula na Kranshi. Mèldu e pèrdida di bo reibeweis na Ofisina di Reibeweis. Hasi bo petishon pa un reibeweis nobo mesora.

Pa apliká pa un pasport òf sédula nobo, mester traha un sita via Bentana di Informashon. Bo por traha un sita via email: sita@gobiernu.cw

Bo no ta inskribí na Kòrsou?

Bai Gabinete di Gobernador, yena e formulario i hasi petishon pa bo pasport (di emergensia).

Tene kuenta! Si tin sospecho di abusu, ta mèldu esaki na polis pa hasi investigashon.

Mas informashon:

  • Yama òf bèl Bentana di Informashon na 0800-1515 (grátis) òf 433-3123
  • Gabinete di Gobernador na 461-8555

Den kaso ku un di e dokumentunan aki riba menshoná a wòrdu hòrtá, semper ta bon pa hasi un denunsia serka polis.

Aksidente di tráfiko

Si ta trata di un aksidente:

  • ku herido grave
  • ku morto
  • di ‘hit & run’
  • komo konsekuensia di pasa den lus kòrá
  • kaminda e shofùr bou di influensia di alkohòl

yama 911 promé i despues Forensys (CRS) na 199.

Si no ta trata di un di e kasonan ariba menshoná, yama Forensys. Si na yegada di Forensys resultá ku un di e personanan enbolbí den e aksidente no tin reibeweis, òf su papelnan di outo no ta na òrdu, ainda por yama 917. Polis lo bin pa traha un prosèsverbal i eventualmente konfiská e vehíkulo en kuestion.

Warda di Polis Rio Canario
Telefòn (+5999) 866-6800
Warda di Polis Otrobanda
Telefòn (+5999) 866-6400
Warda di Polis Punda
Telefòn (+5999) 866-6300
Warda di Polis Montaña
Telefòn (+5999) 866-6700
Warda di Polis Barber
Telefòn (+5999) 866-6900